مصر بتجوز بنتها

زائر

مصر بتجوز بنتها ،،، !!!

لما بيكون فى البيت بنت على وش جواز .. ويجيلها عريس ..

وأول مايبقى خلاص العريس جاى يتقدم .. يتم إعلان حالة الطوارئ فى البيت

بداية من قبل اليوم المنتظر بكام يوم .. ماتعرفش رب الأسرة بيوفر ميزانية منين

للحاجات اللى بتتعمل دى كلها .. واعمال التجديد اللى بتحل على البيت

بداية من طقم العصير الجديد .. او المفارش الجديدة لترابيزة الانتريه ..

او الانتريه ذاته .. وممكن ستاير جديدة .. تخفى البياض اللى وقع من الحيطان

ممكن بقى لو هيتهور .. ويعزم بسلامته ع الغدا .. يبقى فيه طقم صينى جديد

" زمان كانوا بيستلفوه من الجيران .. بس دلوقتى معدش حد بيسلف حد!!!"

لو العيلة دى بقى معاها شوية فلوس .."ماتعرفش برضه هتطلع منين ساعتها"

ممكن يبقى فيه بياض جديد خالص .. أو صالون جديد .. او اى حاجة من دول

آه .. وكمان فى اليوم الموعود .. فيه حظر تجول على ال"عيال" اللى فى البيت

لما الكبار يقعدوا يتكلموا .. يبقى محدش يظهر خالص..

لازمته ايه الكلام الفاضى اللى بأقوله ده؟؟

زيارة اوباما محسسانى .. ان مصر بتجوز بنتها فعلاً !!

واوباما هوة العريس .. الشوارع اللى هيعدى فيها معاليه .. بقت بروبروق "
"

جامعة القاهرة .. اتجددت كلها "للأمانة .. ماعدا القبة" .. البياض

والفرش الجديد ... جامع السلطان حسن .. جددوا السجاجيد اللى العمال بيعيطوا من

سنين عشان تتغير .. النجف جديد .. ده كله عشان خاطر العريس

زى ما ام العروسة بتحاول تدارى كل العيوب اللى فى بيتها . عشان بسلامتها

حماة البت ماتتريقش .. وعشان تعدل "المايل" اللى هوة بخت بنتها

وخصوصاً

ان العريس لُقطة كدة

أحلى حاجة بالنسبة لى انا فى الموضوع ده

اسم جامعة القاهرة .. اللى اتقال اكتر من مرة

مش عارفه ليه حاسه بالفخر

مع انى مش فيها

بس والله مبسوطه

وحاسه ان من مجرد الزيارة دى

بقى لجامعه القاهرة مكانة

واسمها على اكتر واكتر

مع انى ماعنديش اى امل

ان فى يوم

جامعة الزقازيق هيبقى ليها اسم

بس يلا

مبرووووووووك

زائر

تسلمى ليالى على المواضيع الجامده دى